Тараптар Қазақстан президенті Қасым-Жомарт Тоқаев пен Қырғызстан президенті Садыр Жапаров арасында қол жеткізілген келісімдердің орындалу барысын қарастырды. Сауда-экономикалық, инвестициялық, транзиттік-көліктік, су-энергетикалық, туристік, мәдени-гуманитарлық ынтымақтастық және АӨК салаларына қатысты кең ауқымды мәселелер қамтылды.
"Біздің мемлекет басшыларының арасындағы сенімді байланыс өзара құрмет пен шынайы достық рухында көп қырлы ынтымақтастықты жаңа деңгейге көтеруге ықпал етеді. Сауда байланыстарын нығайту және тереңдету екі елдің экономикаларын дамытуға мультипликативтік әсер береді. Өткен жылдың қорытындысы бойынша өзара сауда көрсеткіштерінің 1,7 миллиард долларды құрағанын қуанышпен атап өтеміз. Сонымен қатар, сауда-экономикалық өзара әрекеттестікті одан әрі арттыру үшін елеулі әлеует бар", – деп атап өтті Олжас Бектенов.
"Екі көрші мемлекеттің арасындағы екіжақты ынтымақтастық ерекше стратегиялық мәнге ие. Ежелгі замандардан бері көршілес халықтарымыз ғасырлар бойы достық, тату көршілік және бауырластық қатынастармен, ортақ мәдениет, тіл және тіпті әдет-ғұрыптармен біріктірілген. Бұл кездесудің екі тараптың мүддесіне сай көптеген мәселелер бойынша пікір алмасуға мүмкіндік беретініне сенімдімін", – деді Адылбек Касымалиев.
Келіссөздер барысында бар әлеуетті ашу және тауар айналымын арттыру механизмдері талқыланды.
Транзиттік-көліктік салада Қазақстан мен Қырғызстан шекарасының өткізу қабілетін арттыру үшін кешенді шаралар жүзеге асырылуда. "Ақсу" – "Камышановка" және "Бесагаш" – "Кичи-Капка" шекара өткелдерін модернизациялау және кеңейту жұмыстары жүргізілуде. Сондай-ақ "Сортобе" – "Токмок" және "Аухатты" – "Кен-Булун" өткізу пункттерін дамыту жоспарланған.
Су-энергетикалық ынтымақтастыққа ерекше назар аударылды. Шу және Талас өзендері бойынша вегетациялық кезеңде су жеткізуді қамтамасыз ету, Киров су қоймасын қауіпсіз пайдалану және өңірлік энергетикалық қауіпсіздік мәселелері талқыланды.
Екіжақты тиімді ынтымақтастықтың маңызды бағыттарының бірі – туризм. Жаңа туристік бағыттарды дамыту, трансшекаралық экологиялық маршруттар жасау, белсенді туризм үшін инфрақұрылымды дамыту және қонақ үй бизнесіне инвестиция тарту шаралары талқыланды.
Мәдени-гуманитарлық ынтымақтастық аясында биыл Қазақстан киносының Қырғызстанда күндерін өткізу жоспарланған, сондай-ақ Қырғыз Республикасының аумағында Қазақстан жоғары оқу орындарының филиалдарын ашу мәселелері қарастырылуда.
Келіссөздердің қорытындысы бойынша премьер-министр Олжас Бектенов Қазақстан мен Қырғызстан арасындағы сауда-экономикалық серіктестікті жоғары деңгейде қолдауға дайын екенін атап өтті.
Бұған дейін Қырғызстанда жаңа Министрлер Кабинетінің төрағасы болып Адылбек Касымалиев тағайындалғаны хабарланған болатын.