Картоптың бағасы Қазақстанның өңірлерінде екі есе көтерілді. Бір килограмының бағасы 400 теңгеге дейін жетеді, деп хабарлайды Tengrinews.kz тілшісі.
Елдің өңірлерінде ең көп сұранысқа ие өнімдердің бірі – картоптың бағасы күрт көтерілді.
Ақтөбеде қаңтардың басында килограмының бағасы 200 теңгеден аспаған. Соңғы аптаның ішінде құны екі есе өсті. Бүгінгі күні супермаркеттерде килограмының бағасы 388 теңге. Дегенмен, өнімнің сапасы көңіл көншітпейді: көптеген түйнектер – бұзылған.
2Ақтөбедегі супермаркеттерде килограмм картоп 388 теңге тұрады / Фото ©️ Tengrinews.kz
Дүкендерде де бұзылған картоп сатылады, оның килограмы 400 теңгеге жетті. Сатушылар бұл өнім партияларының әрбірі алдыңғысынан қымбат келетінін айтады.
“Біз келесі жолы картоптың қандай бағамен келетінін білмейміз. Мысалы, бүгін мен оны 360 теңгеден сатып алдым – бұл көтерме бағасы. Менде тек 20 пайыз үстеме бар. Демек, мен оны 420 теңгеге сатамын. Бұл Қарағанды картопы. Жергілікті картоп та бар, бірақ ол әлдеқайда нашар, дегенмен 15 теңгеге арзан,” - дейді бір азық-түлік дүкенінің жалға алушысы.
3Ақтөбедегі дүкенде картоп / Фото ©️ Tengrinews.kz
Басқарма мәліметтері бойынша, Ақтөбе облысына картоп негізінен Павлодар, Қарағанды, Қостанай облыстарынан және Ресейден жеткізіледі. Сондықтан бағалардың қалыптасуы өндірушілерге байланысты, деп түсіндіреді әкімдік.
“Қазіргі уақытта Ресей Федерациясынан картоп экспорттауға тыйым салынды. Осыған байланысты, халықты қолжетімді бағамен картоппен қамтамасыз ету үшін, жергілікті сауда желілері мен коммуналдық нарыққа тұрақтандыру қорынан апта сайын 100 тонна картоп жеткізілуде, оның бағасы 116-119 теңге,” - деп хабарлады Ақтөбе облысының әкімдігі.
Жетісу өңірінде, картоп өсіру аймағы ретінде, бұл өнімнің бағасы 400 теңгеден асты. Бірақ сапасы Ақтөбедегі картоптан әлдеқайда жоғары.
4Жетісу облысында картоптың бағасы 400 теңгеден асты / Фото ©️ Tengrinews.kz
Павлодарда базарда үй картопының килограмы 400 теңге. Дүкендерде “екінші нан” 320 теңгеден сатылады. Павлодардың шетінде картоп 350 теңге. Облыстың кәсіпкерлік және индустриалдық даму басқармасы қаңтардың басында Грузиядан картоп партиясының келгенін, бөлшек саудада оның бағасы 250 теңгеден жоғары екенін хабарлады.
“Облыстың тұрақтандыру қорында 4000 тонна картоп бар, ол әлеуметтік дүкендер мен Павлодардағы фермерлік нарықта сатылады. Алдағы күндері тұрақтандыру қорынан картоп ірі супермаркеттерге жеткізілуі тиіс. Сонымен қатар, бұрын жасалған меморандум бойынша жергілікті шаруашылықтар да әлеуметтік дүкендерге картоп жеткізеді. Тасымалдау шығындарын ескере отырып, килограмының бағасы 120-140 теңге,” - деп мәлімдеді ведомство.
5Павлодардың шетінде картоптың бағасы 350 теңгеге жетеді / Фото ©️ Tengrinews.kz
Қызылордада павлодарлық картоп 360 теңгеден сатылуда. Әлеуметтік дүкендерде жергілікті өнім 135 теңге.
6Қызылордадағы көкөніс бөлімі / Фото ©️ Tengrinews.kz
Шығыс Қазақстан облысында картоптың килограмы 446 теңгеге дейін жетеді.
7Шығыс Қазақстан облысында картоптың бағасы 446 теңгеге жетеді / Фото ©️ Tengrinews.kz
Ең қымбат картоп, белгілі болғандай, Астана қаласында сатылады. Супермаркеттерде сұрыпталған картоптың килограмы 455 теңгеге бағаланады. Кейбір сауда нүктелерінде өнім сөрелерде жоқ немесе қалғандарын сатады.
8 Астана дүкендеріндегі сұрыпталған картоптың килограмы 455 теңге / Фото ©️ Tengrinews.kz
Бұған дейін біз картопты мүлдем жемеген жағдайда не болатыны туралы жазған болатынбыз.