Мәскеуде Ресейдің Қорғаныс министрлігінің бір ғимаратында Ресей Федерациясының әскери контрразведка департаментінің қызметкері әрі гір спортының чемпионы Владимир Фещенко өлтірілді, деп хабарлайды Tengrinews.kz РБК-ға сілтеме жасап.
Негізгі нұсқа – абайсызда кісі өлтіру: пистолет оқы ер адамның басына тиген. Оқиға 13 қаңтарда болды.
"Владимир Фещенконың денесі Мәскеудің ортасындағы ғимаратта табылды. Алдын ала мәлімет бойынша, ол өлтірілген. Екі ер адамның арасындағы жанжал кезінде оқ атылған болуы мүмкін", – деп атап өтті басылымның дереккөзі.
РИА Новости мәліметтері бойынша, кісі өлтірудің себебі әскери қызметкермен болған тұрмыстық конфликт, қылмысқа күдікті ұсталды, қылмыстық іс қозғалды.
Владимир Фещенко. ©️ girevik_online / ВКонтакте
Владимир Фещенко 1998 жылы Мәскеу облысының Краснозаводск қаласында дүниеге келген, 12 жасынан бастап спортпен айналысқан. Ол гір спорты бойынша Ресей мен Еуропаның жасөспірімдер чемпионаттарында бірнеше рет жеңіске жеткен. 2017 жылы жасөспірімдер мен ересектер чемпионатында жеңіске жетіп, Ресей чемпионы атанды.