Цифрлық даму, инновациялар және аэроғарыш өнеркәсібі вице-министрі Асхат Оразбек Қазақстанда жаңа, төртінші мобильді оператордың пайда болу ықтималдығы туралы пікір білдірді, деп хабарлайды Tengrinews.kz тілшісі.
Оның айтуынша, реттеуші тарапынан нақты жоспарлар әзірге жоқ.
"Мен тек потенциалды мүмкіндіктер туралы айттым, яғни мұндай мүмкіндік бар. Бірақ бүгінгі таңда реттеуші тарапынан төртінші мобильді операторды нарыққа шығаруға қатысты ешқандай жоспар жоқ", - деді Оразбек Сенаттағы брифингте.
Вице-министр бұл позицияны түсіндірді.
"Егер бүгінгі таңда жұмыс істеп тұрған үш оператор нарықта тиімді бәсекелесетін болса, онда біз қосымша бәсекелестікті арттыру қажеттілігін көрмейміз", - деп толықтырды ол.
Еске салайық: бұған дейін Асхат Оразбек Қазақстанда төртінші оператордың пайда болуы мүмкін екенін айтқан.
