Жамбыл облысының мамандандырылған аралық экономикалық сотына Массачусетс штатындағы New Balance компаниясы жеке кәсіпкер Б.-ға заңсыз түрде компанияның сауда маркасын пайдалану туралы арызбен жүгінді, деп хабарлайды Tengrinews.kz.
Компания өз өнімін кәсіпкерден интернет-дүкен арқылы сатып алып, сауда маркасының заңсыз пайдаланылғанын анықтап, сотқа жүгінді.
"Талапкер NEW BALANCE сауда маркасының эксклюзивті құқықтарының иесі. Онлайн сатып алу барысында талапкер жауапкердің Kaspi.kz қосымшасындағы онлайн-дүкенінде сауда маркасын рұқсатсыз пайдаланатыны туралы хабардар болды", - делінген сот хабарламасында.
Талапкер сотқа фискалды чекті, фотосуретті және сатып алу видеосын ұсынып, жауапкердің контрафактілік өнімді сатқанының дәлелін растады.
Сот тараптарды татуластыру шараларын қабылдады, содан кейін тараптар бітім келісіміне қол қойды.
"Келісімнің шарттарына сәйкес, жауапкер 100 мың теңге көлемінде талапты мойындайды: 73 мың теңге көлемінде өтемақы және құқық бұзушылықты тіркеуге кеткен 27 мың теңге шығын. Сонымен қатар, жауапкер талапкердің сауда маркаларын пайдаланбайды, бұл туралы кепілдеме хаты қол қойылды", - деп хабарлады соттың баспасөз қызметі.
Талапкер қалған бөліктен, яғни 296 мың теңге көлеміндегі өтемақы талаптарынан бас тартты.
Соттың шешімі заңды күшіне енді.
New Balance - Бостон қаласында (Массачусетс, АҚШ) орналасқан спорттық киімдер желісінің өндірушісі.
Бұрын Астана қаласының мамандандырылған аралық әкімшілік соты неміс Hugo Boss AG компаниясының интеллектуалдық меншік объектілері бойынша құқықтарын қалпына келтірді.
