Үкімет 2038 жылға дейінгі Қошқар қаласының жалпы жоспарын бекітті. Бұл құжат қаланың әлеуметтік, экономикалық және инженерлік инфрақұрылымын жақсартуға бағытталған кешенді дамуын қамтамасыз етеді, деп хабарлайды Ақмола облысы әкімдігінің баспасөз қызметі.
Жалпы жоспар тұрғын үй құрылысын кеңейтуді, көлік жүйесін дамыту, әлеуметтік инфрақұрылымды жақсартуды және экологиялық тұрақтылықты қамтамасыз етуді қамтиды.
Бірнеше негізгі бағыттар анықталды: тұрғын үй құрылысын және әлеуметтік нысандарды дамыту, көлік және инженерлік инфрақұрылымды жақсарту, өнеркәсіпті және кәсіпкерлікті дамыту, экологиялық тұрақтылық пен көгалдандыру, қалалық аумақтарды оңтайландыру және халық санының өсуін ескеру.
Қаланың жалпы аумағы 60,2 шаршы км. Жалпы жоспар аясында аумақты тиімді пайдалану қарастырылған, қоғамдық және тұрғын аудандардың функционалдық аймақтары анықталған. Болжам бойынша, халық саны 2023 жылы 51,7 мың адамнан 2030 жылы 107 мың адамға және 2038 жылы 150 мың адамға дейін өседі. Жұмыссыздық деңгейі 3%-ға дейін төмендетілуі тиіс деп атап өтілді.
Қалада тұрғын үйдің қолжетімділігін қамтамасыз ету үшін төмен қабатты, орта және көп қабатты тұрғын үйлер салынады. Жеке тұрғын үй құрылысына 900 га, ал көп қабатты тұрғын үй құрылысына 360 га жер бөлінеді. Қазіргі уақытта жалпы тұрғын үй қоры 1,28 млн м² құрайды.
2038 жылға дейін қосымша 4,5 млн м² тұрғын үй салу жоспарлануда. Қала тұрғындарының жайлы өмір сүруі үшін жалпы жоспар аясында келесі әлеуметтік нысандардың құрылысын салу қарастырылған: 31 балабақша (13,5 мың орын), 16 мектеп (23,8 мың орын), облыстық аурухана (900 төсек) және 7 емхана, көпфункционалды мәдени орталықтар, кітапханалар, театрлар. Сонымен қатар, қоғамдық демалыс аймақтары да назардан тыс қалмайды. Жалпы жоспарға парктер, гүлзарлар және жағалау аймақтары да енгізілген.
Қошқар қаласының көлік жүйесін жақсарту үшін жаңа магистральдар мен жол өтпелері, сондай-ақ қоғамдық көлікті дамыту жоспары қарастырылған. Жаңа көлік дәліздері мен айналма жолдар құрылатын болады. Қоғамдық көлік маршруттарының жалпы ұзындығы 81,04 км-ге жетеді. Сондай-ақ, жаңа автобус паркін және қоғамдық көлік тұрағын салу жоспарлануда.
Инженерлік инфрақұрылым бөлігінде су құбыры және кәріз желілерін кеңейту, сондай-ақ қаланың толық газдандырылуы және жаңбыр суын бұру жүйесін дамыту жоспарлануда.
Негізгі назар өнеркәсіпті және кәсіпкерлікті дамытуға бағытталады. Қалада 264 га аумақты қамтитын өнеркәсіптік аймақ құру, көлік-логистикалық кешендер мен қоймаларды салу, ауыл шаруашылығы өнімдерін қайта өңдеу кәсіпорындарын, сауда-сервис орталықтарын дамыту жобалары жоспарлануда.
Қошқар қаласының экологиялық тұрақтылығы мен көгалдандыруы - басты міндеттердің бірі. Жалпы жоспар аясында экологиялық тұрақтылықты қамтамасыз етуге ерекше назар аударылған. Қоршаған ортаны қорғау шаралары да енгізілген. Мысалы, аумақты абаттандыру шеңберінде 132,5 га аумақты көгалдандыру, Сарқыраманың жағалауларын абаттандыру, қалдықтарды қайта өңдеу пункттерін ашу, ағынды суларды тазарту жүйесін жетілдіру, қаланың ауа сапасын бақылау станцияларын орнату, сондай-ақ жаңа парктер мен скверлер, жасыл қорғаныс белдеулерін салу жоспарлануда.
Бұған дейін Қошқарда инфрақұрылымдық жобаларды басқару тиімділігін арттыру мақсатында «Біртұтас дрондар инфрақұрылымы» пилоттық жобасы іске қосылатыны хабарланған.
2025 жылғы 8 ақпанда Қошқардың жаңа генпланы премьер-министр Олжас Бектеновке таныстырылды.