Қазақстан үшінші елдерге картоп экспортын тоқтатты, деп хабарлайды Kapital.kz бизнес ақпарат орталығы ауыл шаруашылығы министрлігінің баспасөз қызметіне сілтеме жасап.
Ауыл шаруашылығы министрлігінен хабарлағандай, қазіргі уақытта көрші елдер тарапынан қазақстандық картопқа деген сұраныс жоғары болып отыр.
2024 жылдың қорытындысы бойынша Қазақстаннан шамамен 605 мың тонна картоп экспортталды, бұл 2023 жылғы деңгейден 1,5 есе көп - сол кезде көрсеткіш 411 мың тоннаны құрады. Бұл көрсеткіш соңғы 10 жылдағы рекорд болып, ішкі бағаларға елеулі әсер етті, деп түсіндірді АШМ.
«Осыған байланысты нарықтағы жағдайды тұрақтандыру және бағалардың өсуін болдырмау мақсатында 2025 жылғы 18 қаңтардағы сыртқы сауда саясаты және халықаралық экономикалық ұйымдарға қатысу мәселелері жөніндегі ведомствоаралық комиссияның шешімімен Қазақстан Республикасының аумағынан картопты барлық түрдегі көліктермен экспорттауды 6 айға шектеу туралы шешім қабылданды. Ведомствоаралық комиссияның шешіміне сәйкес 2025 жылғы 27 қаңтардағы № 26 ауыл шаруашылығы министрінің «Қазақстан Республикасының аумағынан картопты экспорттау мәселелері туралы» бұйрығымен үшінші елдерге картоп экспорттауға тыйым салынды», - делінген аграрлық ведомствоның ақпаратында.
Қабылданған шаралар картоп бағасының күрт өсуін болдырмауға және нарық қатысушыларының спекулятивті әрекеттерін тоқтатуға мүмкіндік береді.
Естеріңізге сала кетейік, бұған дейін үкіметтің баспасөз қызметі елдегі картоп жағдайына байланысты күшейтілген мониторинг жүргізіліп жатқанын және сауда қызметі бойынша заңнаманы бұзған жағдайда «нарық қатысушыларына дереу шаралар қабылданатынын» хабарлаған болатын.
Профильдік министрлік 2025 жылдың ерте өнім жинауына дейін ішкі қажеттілікті толық қамтамасыз ету үшін жеткілікті көкөніс қорлары бар екенін мәлімдеді.
Қазақстанның Сауда және интеграция министрлігі өнімсіз делдалдарды анықтау жөніндегі комиссиялардың нәтижелерін ұсынды. Тексерулер барысында картоптың әлеуметтік маңызы бар өнім ретінде 15%-дан асатын сауда үстемесін бұзу бойынша 49 құқық бұзушылық анықталды.