Переговорлардың аяқталуымен Қазақстан Республикасының Президенті Қасым-Жомарт Тоқаев және Иордан Хашимит Корольдігінің Королі Абдалла II бен әл-Хусейн Бірлескен мәлімдемені қабылдады, деп хабарлайды Ақорда баспасөз қызметі.
Сондай-ақ, мемлекет басшыларының қатысуымен ресми делегация мүшелері келесі құжаттарға қол қойды:
1. Қазақстан Республикасының Үкіметі мен Иордан Хашимит Корольдігінің Үкіметі арасындағы өнеркәсіптік ынтымақтастық туралы өзара түсіністік меморандумы;
2. Қазақстан Республикасының Энергетика министрлігі мен Иордан Хашимит Корольдігінің Атом энергиясы жөніндегі комиссиясы арасындағы атом энергиясын бейбіт пайдалану саласындағы ынтымақтастық туралы өзара түсіністік меморандумы;
3. Қазақстан Республикасының Ұлттық экономика министрлігі мен Иордан Хашимит Корольдігінің Өнеркәсіп, сауда және қамтамасыз ету министрлігі арасындағы өзара түсіністік және ынтымақтастық меморандумы;
4. «Самұрық-Қазына» ұлттық компаниясы акционерлік қоғамы мен Иордан Хашимит Корольдігінің Инвестициялар министрлігі арасындағы ынтымақтастық туралы келісім;
5. Қазақстан Республикасының Президенті жанындағы «Телерадиокомплекс» республикалық мемлекеттік кәсіпорны мен Jordan Radio and Television Corporation арасындағы өзара түсіністік және ынтымақтастық меморандумы.
Сондай-ақ, мемлекет басшысының Иорданияға ресми сапары барысында 10 ведомствоаралық және коммерциялық құжаттарға қол қойылды.
Бұған дейін Қасым-Жомарт Тоқаев пен Абдалла II бен әл-Хусейн сауда, инвестиция, өнеркәсіп, ауыл шаруашылығы, көлік және логистика, туризм, энергетика, цифрландыру және фармацевтика сияқты негізгі секторлардағы байланыстарды дамыту перспективаларын талқылады. Сонымен қатар, «Қазатомпром» және Иорданияның мемлекеттік уран өндіру компаниясы Jordan Uranium Mining Company (JUMCO) ынтымақтастық туралы меморандумға қол қойды. «Қазатомпромның» Иорданиядағы уран жобаларына қатысуы туралы JUMCO-мен 2024 жылдың соңында Қазақстан-Иордания үкіметаралық комиссиясының бесінші отырысында келісілді.